ខេត្តឧត្តរមានជ័យ ព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និង ជាទីប្រឹក្សាពុទ្ធិកសមាគកម្ពុជរដ្ឋ បាននិមន្តនាំយកគ្រឿងឧបភោគបរិភោគ មានត្រីឆ្អើ , អង្ករ ,ទឹកបរិសុទ្ធ , កាហ្វេ ភេសជ្ជៈ, ត្រីខ ,មាន់អាំង ,សាប៊ូ និង ថវិកា ជូនដល់វីរៈកងទ័ពជួរមុខ ដែលកំពុងឈរជើងការពារបូរណភាពទឹកដីក្នុងភូមិសាស្ត្រខេត្តឧត្តរមានជ័យ ថ្ងៃទី ២៤ ខែ មេសា ឆ្នាំ២០២៦។
ព្រះវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្តប្រាសាទគោកចក និងជាទីប្រឹក្សាពុទ្ធិកសមាគកម្ពុជរដ្ឋ បានមានព្រះថេរដីកា អរគុណដល់បងប្អូនវីរៈកងទ័ពជួរមុខដែលបានខិតខំប្រឹងប្រែងការពារបូរណភាពទឹកដី និងរក្សាសន្តិសុខជូនជាតិមាតុភូមិ ។ ព្រះអង្គបានមានព្រះទ័យស្រណោះបងប្អូនវីរៈកងទ័ពដែលត្រូវប្រឈមនឹងការលំបាកសព្វបែបយ៉ាង និង ឆ្ងាយពីកូន ប្រពន្ធ គ្រួសារសាច់ញាតិ និង ឪពុកម្តាយ ហាលភ្លៀងហាលខ្យល់ ដើម្បីទឹកដីខ្មែរ និង ប្រជារាស្រ្តខ្មែរបានសុខសាន្ត ។ ព្រះអង្គមានថេរដីកាបន្តថា ដោយមានកិច្ចការចាំបាច់នៅសមរភូមិក្រោយ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ព្រះអង្គ មិនបាននិមន្តមកជួបសំណេះសំណាល សួរសុខទុក្ខញោមៗវីរៈកងទ័ព នៅជួរមុខ ព្រមទាំងបានផ្តល់នូវពុទ្ធឱវាទមួយចំនួន និង ក្រើនរំលឹកដល់គ្រប់វីរៈកងទ័ពទាំងអស់ មានការប្រុងប្រយ័ត្ននៅគ្រប់វិនាទី ក្នុងការការពារខ្លួន និងការពារទ្រព្យសម្បត្តិ ទឹកដី ព្រមទាំងអាយុជីវិត គឺយើងត្រូវតែការពារក្នុងករណីមានគេមកបំពាន់ ឬមកឆក់ប្លន់ ។ ព្រះអង្គបន្ថែមទៀតថា ការការពារទឹកដីនេះ ជាការបំពេញកតញ្ញូដ៏ប្រសើរណាស់ ហេីយផលនៃកតញ្ញូនេះនឹងនាំឲ្យកងកម្លាំងប្រកបតែនឹងសុខចម្រើនជានិច្ច។ ព្រះអង្គបានបួងសួងដល់វត្ថុស័ក្តសិទ្ធិទាំងអស់នៅលើលោក សូមជួយថែរក្សាកងកម្លាំងប្រដាប់អាវុធទាំងអស់ឲ្យទទួលបានជោគជ័យលើសត្រូវដែលឈ្លានពាន នៅគ្រប់សមរភូមិ និងដើម្បីថែរក្សាការពារសុខសន្តិភាព ។ ក្នុងនោះព្រះអង្គក៏បាន ធ្វើការប្រោះព្រហ្មប្រសិទ្ធពរជ័យ សិរីមង្គល ដល់បងប្អូនវីរៈកង ទ័ពផងដែរ ។
ក្រៅពីគ្រឿងឧបភោគបរិភោគ ព្រះវិចិត្រវង្សា ហែម គឹមសាន ញាតិធម្មោ បានប្រទានថវិកាដល់វីរៈកងទ័ព ម្នាក់ៗ ២ម៉ឺនរៀល និង ភរិយាកងវីរៈកងទ័ព ១នាក់ ទៀត ៦ម៉ឺនរៀលផងដែរ ៕
