ខត្តកំពង់ធំ៖ បន្ទាប់ពីអគ្គស្នងការនគរបាលជាតិ បានដាក់ចេញការណែនាំឲ្យរឹតបន្តឹងការអនុវត្តច្បាប់ចរាចរណ៍ផ្លូវគោក ក្នុងគោលបំណងកាត់បន្ថយគ្រោះថ្នាក់ និងលើកកម្ពស់សុវត្ថិភាពលើដងផ្លូវ ស្នងការដ្ឋាននគរបាលខេត្តកំពង់ធំ បានអនុវត្តវិធានការនេះយ៉ាងសកម្ម និងមានប្រសិទ្ធភាព។
យោងតាមការបញ្ជាក់របស់លោកវរៈសេនីយ៍ឯក ម៉ង់ វិទូ ស្នងការរងនគរបាលខេត្តកំពង់ធំ ក្នុងបទសម្ភាសន៍ព្រឹកថ្ងៃទី១៧ ខែមីនា ឆ្នាំ២០២៦ បានលើកឡើងថា ក្រោមការដឹកនាំរបស់លោកឧត្តមសេនីយ៍ទោ ហេង សុផល ស្នងការនគរបាលខេត្ត កម្លាំងជំនាញបានចុះអនុវត្តការងារយ៉ាងយកចិត្តទុកដាក់នៅតាមតំបន់សំខាន់ៗ ដោយផ្តោតលើការពង្រឹងវិន័យ និងអនុវត្តច្បាប់ចរាចរណ៍ផ្លូវគោកឲ្យមានប្រសិទ្ធភាព។
លោកបានបញ្ជាក់បន្ថែមថា វិធានការនេះមានតួនាទីសំខាន់ក្នុងការទប់ស្កាត់អំពើល្មើស និងរៀបចំសណ្ដាប់ធ្នាប់ចរាចរណ៍នៅតាមដងផ្លូវសាធារណៈ ដើម្បីការពារអាយុជីវិត និងទ្រព្យសម្បត្តិរបស់ប្រជាពលរដ្ឋ ព្រមទាំងកាត់បន្ថយអត្រាស្លាប់ របួស និងពិការ។ ការអនុវត្តត្រូវបានធ្វើឡើងដោយស្មើភាពចំពោះអ្នកប្រើប្រាស់ផ្លូវគ្រប់រូប។
ជាលទ្ធផល របាយការណ៍អនុវត្តវិធានការនេះបានបង្ហាញថា ស្ថានភាពបទល្មើសចរាចរណ៍នៅក្នុងមូលដ្ឋាន មានការថយចុះគួរឲ្យកត់សម្គាល់។
ជាមួយគ្នានេះ លោកវរៈសេនីយ៍ឯក ព្រំ ចាន់ថុល នាយការិយាល័យនគរបាលចរាចរណ៍ផ្លូវគោក បានឲ្យដឹងថា កម្លាំងជំនាញបានបន្តចុះត្រួតពិនិត្យ និងអនុវត្តច្បាប់លើអ្នកបើកបរដែលប្រព្រឹត្តល្មើសជាប្រចាំ ដូចជា បើកបរលើសល្បឿន មិនពាក់មួកសុវត្ថិភាព និងមិនគោរពសញ្ញាចរាចរណ៍។
លោកបានបញ្ជាក់ថា ការរឹតបន្តឹងអនុវត្តច្បាប់នេះ មិនត្រឹមតែជួយកាត់បន្ថយបទល្មើសប៉ុណ្ណោះទេ ប៉ុន្តែថែមទាំងរួមចំណែកលើកកម្ពស់ការយល់ដឹង និងការគោរពច្បាប់ចរាចរណ៍របស់ប្រជាពលរដ្ឋឲ្យកាន់តែប្រសើរឡើងផងដែរ។
លោកក៏បានបន្ថែមថា វិធានការនេះជាផ្នែកមួយនៃគោលនយោបាយរបស់អគ្គស្នងការនគរបាលជាតិ ដែលផ្តោតលើការកាត់បន្ថយគ្រោះថ្នាក់ចរាចរណ៍ និងពង្រឹងសុវត្ថិភាពសាធារណៈលើដងផ្លូវ។ចុងក្រោយ លោកវរៈសេនីយ៍ឯក ព្រំ ចាន់ថុល បានអំពាវនាវដល់ប្រជាពលរដ្ឋ និងអ្នកប្រើប្រាស់ផ្លូវទាំងអស់ ឲ្យបន្តគោរពច្បាប់ចរាចរណ៍ឲ្យបានខ្ជាប់ខ្ជួន ដើម្បីធានាសុវត្ថិភាពផ្ទាល់ខ្លួន និងអ្នកដទៃ៕
